يوميات شاب عاطل

بسم الله الرحمن الرحيم
كلنا بنسمع عن مشكلة البطالة فى مصر ومفيش بيت تقريبا فى مصر الا وعنده شاب عاطل(على فكرة انا بتكلم عن الشعب بتاعنا مش الناس اللى بنشوفها على الدش فى القهوة ) المهم انا فكرت ازاى يكون يوم العاطل ومن هنا لاقيت شخصية ممكن نتكلم عنها شاب زى الفل معاه بكالويوس تجارة بتقدير مقبول واسمه محروس ونشوف ازاى اخينا ده عايش يومه .


قوم بقى يا محروس المغرب اذن انت هتفضل نايم لحد امتى (ده كلام خالتك سعدية ام محروس)
يووووووووووه هو الواحد ميعرفشى ينام شوية فى البيت ده. تعبان يا ناس نايم وش الفجر (طبعا ده محروس بيه)
وبعدين بعد شد وجذب بين محروس وامه خالة سعدية يقوم المحروس من العين محروس عشان ياخد دش وياكل لقمة ويلحق يروح يقعد على القهوة اللى فى اول الشارع.
مش عارف البنات هيفضلوا يضيقوا فى البناطيل بتاعتهم دى لحد امتى (ده عباس صديق محروس على القهوه لما شاف مديحة بنت الاستاذ راضى مدرس التاريخ)
سيبهم ياعم خليهم يلبسوا المحذق والملذق خلينا نتفرج يعنى لا هيبقى جواز ولا حتى فرجة (ده بقى سعيد جار محروس وصديقه الانتيم)
احلوا احلوا شوفوا بقى مين اللى هيجوزكم ( رد محروس)
المهم والرجالة محروس وسعيد وعباس قاعدين على القهوة يتفرجوا على اللى رايحة واللى جاية سمعوا الاستاذ عبد الباسط الموظف فى الحكومة بيتكلم مع الاستاذ محمدى الموظف فى الحكومة بردو
يا اخى التليفزيون والجرايد ملهاش سيرة الا عن 30% اللى قال عليهم الريس فى عيد العمال (ده الاستاذ محمدى)
سيب ياعم الشعب يهيص شوية ربنا يخلى الريس للناس الغلابة (رد عليه الاستاذ عبد الباسط)
بس تفتكر الحكومة هيجيب الفلوس دى منين انا سمعت يا محمدى ياخويا ان العلاوه دى هتتكلف مليارات والدولة بتاعتنا يادوب على قد حالها.
رد محمدى: اكيد هيخصخصوا ويبيعوا شوية حاجات.
عبد الباسط: هو لسه فيه حاجة لسه متباعتشى؟
محمدى: طيب هيجيبوا الفلوس دى منين
وبعدين سكتوا الاتنين وبصوا لبعض شوية وكان تفكيرهم فى حاجة واحدة وهى
اكيد هيغلوا الكهربا والتليفون والنظافة وينزلوا الضرايب العقارية على الشقق.
وبعدين قالوا فى صوت واحد يعنى اللى هناخدوا باليمين هندفعوا بالشمال وسلملى على العلاوه و30%
بعدها بص سعيد لمحروس وقاله: ياترى هيجى اليوم وناخد احنا كمان علاوة
رد عليه محروس: مش لما نعرف يعنى ايه علاوه الاول !!!!!!!!!!!!!!!!

بعد ما قام محروس من على القهوة راح يدور على مكان يقضى فيه باقى السهرة فكر يروح لرامى جاره
( ورامى ده يبقى جار محروس ومخلص كلية حاسبات ومعلومات بس زيه زى معظم شباب مصر عاطل ومش معاه واسطة عشان يشتغل ففكر انه يشترى كام جهاز كمبيوتر ويفتح محل نت كافيه او سابير زى ما كل الناس بتسميه)
قعد محروس مع رامى فى المحل يسهر معاه شوية ويدردشوا سوا
محروس: ايه اخبارك يا رامى ؟ واخبار المحل ايه؟
رامى: الحمد لله اهى ماشية . ياريت انت كمان يا محروس تفكر فى مشروع تعمله عشان زى مانت عارف الشغل دلوقتى بقى كله بالواسطة واحنا غلابة والغلابة اللى زيينا معاهم ربنا.
محروس: وحتى لو فكرت فى مشروع هجيب فلوس منين؟ ولو استلفت فلوس المشروع هلاقى حاجة اسمها التراخيص والضرايب والتامينات والكهرباء والنظافه وبلاوى كتير اصل الحكومة بتاعتنا مش شاطره الا على الغلابة انما الناس اللى فوق مش بتقدر عليهم نظام مشى حالك حالك يمشى.
رامى: ازاى ياعم انت مش بتسمع ان الحكومة بتساعد الشباب انهم يعملوا مشاريع عشان تقلل نسبة البطالة فى البلد
محروس: هو انت بتصدق الكلام ده؟
رامى: ايوه يابنى هى دى الحقيقة صدقنى
ويادوب رامى لسه مخلص كلامه الا وعربية بوكس وقفت قدام المحل ونزل منها ضابط وكام مخبر
الظابط: مين صاحب المحل؟
رامى: انا ياباشا
الضابط: معاك ترخيص ياله؟
رامى: انا لسه ياباشا فاتح من اسبوع ولسه بحضر ورق التراخيص
الظابط: انت هتستهبل ياروح امك
رامى: ياباشا انا مهندس ومعايا بكالويوس حاسبات ومعلومات
الظابط: مهندس هناك عند امك مش عليا
الظابط قال للمخبرين هاتوه راحوا رموا رامى فى البوكس وحرزوا الاجهزة وشمعوا المحل بالشمع الاحمر.
بعدها عرف محروس ان دى اسمها مباحث المصنفات ورامى هيبات فى الحجز لحد لما يتعرض تانى يوم على النيابة عشان يتعمله قضية مصنفات.
مشى محروس باليل فى الشارع وهو مروح على بيته يغنى:
لما تلاقى المصنفات داخلة عليك
والظابط والمخبرين بيلطشوا فيك
يبقى انت اكيد اكيد فى مصر
يبقى انت اكيد اكيد فى مصر
اكييييييييييييييييييييييييييييييييد فى مصر !!!!!!!!!!!!!!!!!!!!!!!!!!!!!!!!!!!!!!

الحلقة الثالثة

سعيد: اكيد هيخرج النهارده من النيابة وهيتعمله قضية مصنفات.
محروس: مش كنا خدنا محامى معانا.
سعيد: اكيد ابو رامى هناك ومعاه محامى وبعدين انا كلمت الوله سكسكه عاملى فيها المهم وهو حته محامى تحت التمرين بقاله سنتين وشغال ببلاش كمان.

رامى: ليه كده؟ ده كله عشان فكرت اعمل مشروع ومبقاش عاطل.
محروس: متزعلشى نفسك انا قولتلك انهم مش بيقدروا الاعلى الغلابة.
سعيد: انا قرات ان رجال الاعمال عليهم مليارات للحكومه والحكومه مش عايزه تاخدهم.
محروس: انت اهبل يابنى هما هياخدوا الفلوس من نفسهم.
رامى: مش فاهم يعنى ايه من نفسهم.
محروس: اصل الحكومة بتاعتنا تبقى حكومة رجال الاعمال يعنى معظم الوزرا رجال اعمال وهما اللى عليهم فلوس للحكومه.
سعيد: يعنى الوزير مش معقول هياخد فلوس الحكومة من نفسه ولا يقدر حد تانى ياخدهم منه.
رامى: هو ايه اللى بيحصل فى البلد؟ وايه اللى فى البلد دى بقى صح دلوقتى ؟
سعيد: الفول الفول هو الحاجة الوحيدة الصح دلوقتى.
رامى ومحروس فى صوت واحد: يا جعان.

سأل محروس عم فرج: ليه ياعم فرج اليافطة دى؟
عم فرج: هنعمل ايه يابنى كل حاجه عماله تغلى حتى الفول اللى هو اكل الناس الغلابة غلى كمان وكل يومين بسعر جديد.
رامى: مش عارف الناس بعد كده هتاكل ايه؟
سعيد: هتاكل بعضها . اعملنا ياعم فرج 6 شقق فول.
عم فرج: شقة الفول ب75 قرش.
محروس: ليه هيا شقة مفروشة؟
رامى: دى كانت بربع جنيه.
عم فرج: الله يرحم ايام زمان.

الاول: المواصلات كمان غليت.
التانى: عشان البنزين والجاز غلى.
الاول: هما مش قادرين يستنوا لما الناس تفرح بالعلاوة.
التانى: انت متعرفشى ان الفرح دلوقتى بقى جريمة فى مصر.
الاول: والله حرام اللى بيحصل فينا ده.
التانى: اسمع النكة دى