يوميات احد مشرفين المنتدى (تم وضع الحلقه التاسعه و الاخيرة)

طيب اكبر دليل على ذلك كلمة الحلقة تعرب مبتدا مرفوع بالفتحة المكسورة صح ولا لا ؟؟؟؟

مظبوط مظبوط هو دا العربى و لا بلاش

الحمــــــــــــــــد لله
فلت المره دى من الحلقه الرابعه

ربنا يستررررررررر ع الباقي

بس جاااااامده
تسلم ايديك وفي انتظار الباقي

هههههههههههههههههههه ايوة فليتى بس هتروحى منى فيييييييييين ؟؟؟؟

الحلقه الخامســه

كركر مخاطبا مهند : متنساش تجيب الديجيتال كاميرا العهدة بتاعة المنتدى اللى بنصور بيها الأعضاء الجداد وش وقفا وهما بيسجلوا عندنا هنا أول مرة يوم الزيارة علشان تاخدولى كام صورة مع العيلة المالكة

مهند : أمرك يابوص....نتكلم دلوقتى عن التنظيم ... أقترح إننا كلنا نلبس بدل اسموكن سودا وبابيون أحمر

امجد : بس شكلنا كده حنبقى زى السفرجية ياكنج .... أنا بقول يعنى بلاش نلتزم كلنا بنفس اللبس ... يعنى اللى عايز ييجى ببدلة ييجى... اللى عايز ييجى بجينز وتى شيرت ييجى... وكده يعنى

ابو تريكه : فكرة حلوة يا جوجو التى شيرت دى....إحنا نلبس كلنا تى شيرت واحد عليه صورة كركر كرمز للمنتدى وبنطلونات شورت زى بتاعة الكشافة وجزم اديدز وشرابات طويلة لغاية الركبة ونشغل فى الخلفية أغنية شادية دى اللى بتقول (غاب القمر يابن عمى يلا روحنى...دى النسمة أخر الليل بتفوت وتجرحنى) علشان الناس يعنى تعرف إن أنا وكركر ولاد عم

سامح : ياعم شورتات إيه بس وغاب القمر إيه .... أهم حاجة نلبس كلنا نضارات سودا ونحط سماعات فى ودانا ونقعد نتلفت حوالينا وورانا ونبص لبعض كل شوية نظرات قبيحة ومريبة فى نفس الوقت... زى ما الحرس الخصوصى بتوع الريس بيعملوا ...ولازم نبقى على إتصال مع بعض باللاسلكى أثناء الزيارة.....مهم جدا اللاسلكى ده علشان ننبه بعض لو عضو من إياهم حاول التسلل أثناء الزيارة

مهند : لازم نحبس الأعضاء أثناء الزيارة اللى إحنا متأكدين من عدم ولائهم للريس ... المشكلة إننا لو عملنا كده مش حيتبقى غير تلاته أربعة ومش حنعرف نجيب أعضاء نوقفهم قدام أبواب المنتدى علشان يهتفوا ويرحبوا بالموكب

شيماء : مش مشكلة ... نجيب كومبرس على إنهم الأعضاء... كمان هيلزمنا حتتين سلاح.....لازم أوصل البلد عندنا أشترى كام فردة واجيب أنفار

ساسو : واجب برضه نشترى شوية بالونات وبمب والعاب هوا .... نسينا كمان نعمل قسم جديد فى المنتدى نسميه ( المستقبل) علشان جمال مبارك يفتتحه.....ولازم كمان نحط شريط سوليفان على كل باب من أبواب المنتدى علشان مبارك وسوزان وجمال يقصوهم....لازم ياجماعة كل واحد يقص له شريط على الأقل....ولو إتبقت شرايط بعد كده أقصهم أنا

تعالت أصوات المشرفين إحتجاجا على رغبة ساسو بأن تقص ما تبقى من شرائط

امجد : وليه مقصهمش أنا

مهند : محدش حيقص غيرى

امجد : طب يمين على يمينك محد هيقص إلا أنا....ثم تنتابه نوبة من البكاء الشديد وتدور الدنيا به وتظهر أمام عينيه دوامات كأنه يتذكر أيام الطفولة والماضى المنيل بنيله ....يتمدد امجد على الأرض ويتجمع المشرفين من حوله...

يقوم سامح بعمل تدليك سريع للقلب لحد مافاق وبدأ يروى لهم قصته مع الإشراف

امجد : زمان وانا عمرى 7 سنين كنت بروح مع أبويا الدكان كل يوم جمعة بعد الصلاة ...كان عندنا محل أقمشة ..... كانت متعتى إنى أشوف العامل اللى فى المحل وهوه بيقص القماش للزباين....كان عنده مقص كبير قوى طوله يجى نص متر ... مره سهيته وخدت المقص وخبيته فى جيب القميص بتاعى لكن أبويا شافه ونزل فيا ضرب بالإقلام والشلاليت وإنضم له كل العمال فى الدكان لحد ما سخسخت.....من ساعتها وأنا أى حاجة بشوفها ببقى عايز أقص منها

مهند : أمال لو حكيتلكم حكايتى حتقول إيه

كركر : طيب .. ندخل فى البند اللى بعده والخاص بالمأكولات والمشروبات التي ينبغي ان نوفرها للسيد الرئيس واللى جايين معاه ، ممكن أسمع أرائكم ؟

اسلام : بـــس أنا جتلي فكرة جهنمية ، منها نعمل حاجة تشرفنا قدام الناس دي ومنها نوفر

كركر : قول يا أخ اسلام إحنا سامعين

اسلام : أنا انزل السوق أشترى كرومباية على 2 ك بتنجان أبيض وحزمة ملوخية خضرا و 4 ك لحمة ضاني ونخلى المشرفات يعملوا حلتين محشي و ملوخية وناكل كلنا ونهيص والريس برضه ياكل ويهيص ... والله الأكلة دي أنا فكرت فيها وتوصلت ليها من شكل أحمد نظيف

كركر : ممكن يا اخ اسلام تطلع بره شويه وهانندهلك لما نخلص

اسلام : حاضر .. بس ليه يا كنج ؟

كركر : يا اخ اسلام بنقولك ريس ووزرا ومرات الريس وولاد الريس ... تقولنا محشي ، يا اخي عيب كده .. ده كان إستهلال لابد منه .. هـــــا يا سادة انا عايز مشاركين لا متفرجين

ساندى : بس وجدتها ... إحنا نعمل علب وجبات وكل وجبة فيها سندوتشن جبنة رومي وحتت جاتوة

نهال : إيه نظام الأفراح البلدي ده ؟ عايزين أفكار محترمة يا أخوانا

شيمــاء : انا بأقترح المنيو الآتية : المين كورس يبقى بيكاتا بالشامبينيون مع كريب جورجيت وتشكين آلاموند والحلو يبقى باقيا بالمسطردة

كركر : يا شيمــاء الناس اللي جايه دول مصريين ولازم نعمل لهم حاجة يفهموها عشان ياكلوها ... خلص الكلام

نهال : كركر .. كركر .. ممكن أقول رأيي ؟

كركر : أيوه وماله من حقك يا نهال ما انتى بنى ادمه زينا برضه

نهال : زى ما انتوا عارفين ان من ضمن هواياتى تربيه البط و انا مربيه عندى فى البيت تحت بير السلم كام دكر بط على فرختين بيض و اعلقلكم من البيت كام كيلو برتقان بصرة على اتنين كيلو موز و نمشى الحوار

سندرا : والله شكلكوا هاتكسفونا مع المحشي والبط والكلام ده والريس هايجيب هايغلق المنتدى بسببكم ، يا جماعة الناس اللي جايه فيهم ناس كبيرة في السن يعني بالتأكيد عندهم السكر والضغط والكوليسترول والكلام ده .. عايزين حاجات خفيفة وصحية وعلى رأي المثل " صحي ومفيد "

مهند : شكرا يا سادة .. بعد ما أستمعنا إلى جميع الآراء بشكل ديمقراطي ديماجوجي .. احب أقوللكم إن انا وامجد و كركر إتفقنا من الاول إننا نتصل بولعتين عشان يبعت لنا وجبات جاهزة وتبقى حاجة محترمة قدام الريس ...

اسلام : يحيا العدل هي دي الديمقراطية ... الله ينور عليك بس عدم اللامؤخذه إنتوا كنتوا جايبنا ليه وسمعتوا أرئنا ليه ؟

امجد : ممكن تسكت ؟

اسلام : حاضر ياعم .. حاضر ياخويا .. ولعتين ولعتين .. أهو برضه أحسن من مطعم زيزينيا اللي ادام الجامعة

شيماء: بس يا مهند ماتنساش تزيد الوجبات عشان الاعضاء

مهند : اعضاء مين يا شيماء اللي هايكلوا من ولعتين ؟ يا ست الكل دول هانجيب لهم ساندوتشات فول وطعميه وحتتين طرشي وأقلب .. قال نأكلهم من ولعتين قال .. والله عال .. ناقص تقولي كمان ييجوا يسلموا على الريس ويتصوروا معاه

كركر : ننتقل للبند اللي بعده ... المشروبات ... ولو سمحتوا اللي هاشاور عليه هو بس اللي يتكلم مش عايزين فضايح ... أيوه أتفضل يا اخ اسلام مع إنك مش مسموحلك بالكلام إلا بعد ما تقضي 6 شهور إشراف شاق مع الشغل .. لكن زي بعضه إنطلاقا من تعميق تجربة الديمقراطية وكــنفحة من عطفي ونبذة من حبي وشلحة من حناني هاسيبك تتكلم ......بس إوعى تعك

اسلام : ربنا يخليك لنا يا بوص ده أحنا من غيرك ولا حاجة وناقصنا كام مليون حاجة

امجد : هايشتغل بقى في الاغاني الحمضانة بتاعت شادية ومصر اليوم في عيد وهاينكش لنا القصة بتاعته .. الشغل ده أنا عارفه

كركر : مش انا قولت ماحدش يتكلم إلا اللي أشاور عليه .. قول يا اسلام قول يا حبيبي

اسلام : إحنا نجيب قزازتين نبيذ احمر يا كينج وكل واحد ياخد له بؤ عشان يفتح نفسه وياكل بمزاج

كركر : خيبك الله !!!!!! خسئت وخسئت أفكارك ... خمر ؟.. منكر ؟ إنت عايز الناس تسكر وتقوم تدور الضرب في بعض .. وبعدين إحنا مستمحلينهم وهما فايقين لما نستحملهم وهما سكرانين ... بلاش كلام فارغ .. إتقى الله يا اخي .. ده أنا لسه راجع من العمره ... اعوذ بالله .. اعوذ بالله

اسلام : إيه يا كركر منكر إيه وخمر إيه ؟ بالراحة علينا شوية .. انا قصدي عصير عنب وأنا اللي هاعصره بإيدي كمان

سندرا : كركر ممكن اقول راي فى الموضوع دا ؟؟؟

كركر : انجزى و قولى يا سندرا

سندرا : انا من راي اننا نجيب لكل وزير كانزايه بيبسى او سبرايت ( يا لذيذ يا رايق ) و عشان الريس الكبير نجيبله واحدة لتر

كركر : سندرا انتى مين اللى خلاكى مشرفه ؟؟؟

سندرا انت يا بيج بوص

كركر : من النهرده يا سندرا انتى عضو مع موقوف

امجد : خلاص خلاص يا محمد .. احنا قررنا يا جماعه أساسا إننا نقدملهم يانسون

ساسو : برافو عليك .. أنا بحب جدا الحاجات النيتشورال اللي زي دي

سامح : ممكن اتكلم بقى ولا أروح ؟ أنا معاك يا كينج في فكرة اليانسون والمهدئات دي .. ربنا يهدهم يارب

و الى لقاء فى حلقة قادمه ان شاء الله

ماشى يا امجد انا هروح السوق كمان
وهعصر العنب اه يا خسيس
بس الحلقة جامدة
اووووووى يا مان

جاممممممممممده يا بوووص

ههههههههههههههههههههه
ماشي ماشي
خليك كده بهدل فينا براحتك ياعم
لغايه مانا حاسه ان اخرتنا في اليوميات دى المنتدى كله هيروحوا رحله لابو زعبل
بس بجد جميله
وماتتاخرش بالباقي

keda ya amgd te3ml fya keda
hahahahahahah

ana mosh ba7b el bat wala bate2o bass el 7al2a dy gamda hahhahahah

walahey ya gogo nazrty 3omraha ma hat5eb ank sokr

ههههههههههههههههه هو انا عندى اغلى منكم يا سندرا ابهدلهم

و انتى يا نانا مش بتحبى البط امال ايه اللى انتى بتطلعى تاكلى مين كل يوم فوق السطوح بتاكلى امى يعنى

الحلقه السادســــه

كركر : اختنا الفاضلة سندرا أثارت نقطة مهمة وهى ركن المكتبة ... إزاى ماعندناش مكتبة فى المنتدى طول السنين اللى فاتت دى ... إنتم عارفين إن سوزان مبارك أول ما هتوصل هتسأل على أى مكتبة علشان تفتتحها ... لازم نعمل ركن للمكتبة بسرعة فى المنتدى يكون ملحق بيها بوفيه واستراحة ودورة ميه

سندرا : المكان موجود... فيه مساحة فاضية فى المنتدى الادبى كنا عاملينها خرابة بنحبس فيها الأعضاء المشاغبين ... ممكن نجيب كام بولدوزر يساويها بالأرض ونبنى مكانها مكتبة ... بس المشكلة هنملى المكتبة كتب منين ... محتاجين تمويل...خلص الكلام

امجد : ولا تمويل ولا حاجة ... إحنا نستعير كتب من الأعضاء لحد ما الزيارة تنتهى ... فيه أعضاء كتير مثقفين هنا فى المنتدى عندكم القناص ...حازم ... بنوته زى العسل دى لوحدها موسوعة ... بتقرا كتير جداً ... ده حتى فى ناس بيقولوا إنها إتعمت من كتر القرايا وبتتعالج حالياً فى مستوصف ... بيحطولوها مرهم كل ساعتين فى عينيها ورابطينهم لها بشاش... يعنى مش هيحتاج الكتب دلوقتى فى حاجة

ساندى : ما عميتش ولا حاجة يابنى ... أنا رحت زورتها فى المستوصف إمبارح وقربت من عينيها لمبة 400 وات سمعتها بتقول أح أح وده معناه إنها شايفه الضوء

امجد : يا عينى على ذكائك يا ساندى ..... مش شرط تكون شافت ...... ممكن تكون سوخونية اللمبة حرقت لها الشبكية فانتى إفتكرتها إنها شايفه عميتى البت يا ساندى اشوف فيكى اسبوع و يومين و 5 ساعات

يفتح كركر علبة دواء الضغط ويتناول حبة بعصبية ثم يقول ممكن نركز شوية ياجماعة

مهند : أنا عندى مجموعة كتب مش بطالة فى الأدب والشعر وكتب طبية ممكن أبعتها

امجد: هايل...بس محتاجين كتب أطفال...إنتوا عارفين شوزان...لازم يكون فيه كتب أطفال

مهند : ممكن نهال تساعدنا فى الموضوع ده ... أنا هتصل بيها تبعت لنا شوية كتب من عندها

اسلام : انا ما عنديش أى كتب غير ميكى ... أنا رحت حتى اشترى بطوط او سوبرمان ملقتش

امجد : ميكى ايه و بطوط ايه يا اسلام انت جايب اخواتك تفسحم فى المكتبه احنا بنقول ريس و كلام كبير

كركر : نيجي لأهم واخطر نقطة لابد من الإتفاق عليها ووضع اساسيات وآلية تنفيذ لها .. حيث إن مستقبل احلامنا الحلوة كله يتوقف عليها

امجد : خير قلقتني

كركر : أظن كلامي واضح يا سادة وماهوش رمادي ، نقول كمان .. أنا أعني يا أفاضل نقطة توزيع الادوار .. بمعنى كل واحد مننا هايعمل إيه أثناء زيارة الريس

مهند : أنا فهمتك يا بوص ، بص يا سيدي .. أنا طبعاً هالبس الحتة السموكن السودا اللي عندي واللي ما بطلعهاش غير في المناسبات وأضرب البيبيون المفتخرة على شوية جل على شعري والنظارة الريبان السودا وهابقى ولا الخديوي عباس حلمي في زمانه ... وإنت كمان تعمل زيي وتتصرف لك في أي حتة سموكن ولك مطلق الحرية تلبس بيبيون تلبس كرافتة او كوفية مش مهم .. اما امجد بقا يستلف بدله حلوة كدا بس ابوس كعب رجلك يا امجد ما تستلف البدله اللى جيت بيها الفرح بتاع الاسبوع اللى فات عشان شكلها اصلا العنكبوت معشش جواها .. وانا وإنت و امجد بس نبقى في إنتظار سيادة الريس

كركر : عظيم عظيم ..

مهند : اسلام بقى هايقعد جنبنا على المنصة يلم الأسئلة اللي هاتتسأل للريس ويفرزها وينقحها والأسئلة اللي فيها قلق يرميها في الزبالة

امجد : لا يا نودا سيب اسلام فى حاله عشان الكلمة الافتتاحيه يقعد يمخمخ فيها بدل ما يعك و يودينا كلنا فى داهيه

مهند : خلاص خلى ساندى تقعد هى تلم الاسئله بدل ما هى ملهاش اى لزمه فى الموضوع كدا و تفرزها برضها و تفليها و الاسئله اللى تحس ان الريس ممكن يعتقلنا بسببها ترميه فى الزباله

امجد : على كدا يا مهند هى اصلا مش هتلاقى اسئله و هترميهم كلهم

مهند : لا متخافش يا عم هنلاقى احنا هنغلب يعنى و بعدين انا محضر شوية اسئله هنكتب على كل سؤال اسم عضو و نقدمهم على انهم من الاعضاء

امجد : ممكن اشوف شوية عينات من الاسئله دى يا نودا

مهند : س1 لماذا اخترت حضرتك القاهرة كعاصمة لمصر ؟؟؟

س2 لماذا سميت اولادك جمال و علاء ؟؟؟

دول عينات بس لسه الباقى انقح منهم

كركر: ممتاز إكسلنت .. أنا كمان بأقترح إن شيماء تشرف بنفسها على الأكل عشان تتأكد إن كل حاجة ماشية حسب المعايير الطبية

نهال : إنتوا نسيتوا حاجة مهمة ... الريس لما ييجي يفتتح المنتديات الجديدة بالتأكيد هايطلب يلقي نظرة على المنتديات المفتوحة عندنا واللي ممكن تودينا في داهية

كركر : قصدك إيه ؟.. أفصحى تكلمى أيتها الزميلة الفاضلة

نهال : أنا قصدي منتدى السياسة .. والريس أساساً ما بيطقش السياسة وعشان كده مخلي الشعب ما بيفهمش غير في سياسة التوفيق اللي شعارها بيقول ( يا بخت من وفق راسين في الحلال )

مهند : اتفق تماماً معاكى يا نهال ، وعندك كمان منتدى مكافحة الجراد قصدي الفساد ده لوحده فيه 15 سنة سجن في معتقل المغول لكل واحد فينا

نهال : وما ننساش المنتدى الاسلامى .. الريس ورجالته عندهم تعصب من كل ما هو إسلامي ... انا رأيي نقفله مؤقتاً ونحبس جواه كل الاعضاء ذوي التوجهات الإسلامية .. والله انا خايفه عليهم من الريس

كركر : يعني بإختصار نخليلة الحاجة الخفيفة واللي فيها فرفشة .... أنا فهمتكوا

شيماء : في كمان يا جماعة موضوع كلمة المنتدى التي يجب أن يلقيها أحد الزملاء بالنيابة عننا ... أنا سيبولي الموضوع ده هاحضر كلمة محترمة وأقولها قدام الريس

كركر : شيماء عشان خاطرى خليكى انتى فى الاكل و البطاطس المحمرة و المحشى

أمجد : يبقى ما فيش غير اسلام زى ما اتفقنا قبل كدا ... نخليه يكتب كلمة مختصرة وبأقول تاني مختصرة والأختصار بتاعه ده أنا عارف ممكن يبقى 5 صفح ويملاه شوية مصطلحات مكلكعة زي العودة لمائدة المفاوضات والسلام العادل والشامل ونزع جميع الأسلحة من العرب ومنطقة الشرق الاوسط ما عدا إسرائيل والحاجات دي ... الريس بيموت فالكلام ده وبينشكح قوي لما بيسمعه

مهند : وسع يا جدع إنت وهو ... اما يا كركر فكرتلك في فكرة ... اولاً هاستهال عليها نص شهر مكافأة .. وثانياً اتحدى إن ماكنش الريس ينفحنا فيها قد 100ألف دولار علاوة

كركر : قول انا في عرضك .. أنا في حاجة ماسة إلى أي ألية تدفع السيد الرئيس وتخليه يرضى عننا

مهند : انا طبعت المجلد بتاع " إسلامستان " وجلدته وزخرفته وبقى عامل زي الملازم اللي بنصورها أيام الجامعة قبل الإمتحانات بيومين ... فممكن بمنتهى البساطة أقوم مغير بس العنوان من إسلامستان إلى " مباركستان "
وانا عارف إن مستحيل الريس هايقرأ الحشو اللي جوه لأنه مش فاضي .. هو بس هايشوف العنوان وهايزقطط .. إيه رأيك ؟

امجد : أبوس تلافيف نخاشيش دماغك . ... إنت عبقري إنت فلته .... روح يا شيخ إنت فعلاً تستاهل الدعوة اللي دعيتهالك و انا بصلى لاول مرة

كركر : برافو يا مهند ..... جوووووووووود

مهند : تربيتك يا باشا وكل ده من خيرك

اسلام : بس في نقطة انا أقتل نفسي عليكم لو ما نفذنهاش ...

كركر : إيه خير إتكلم أنا أبتديت أُعجب بيك بعد ما عدلت أفكارك المسمومة بتاعت المحشي والملوخية

مهند : استنى بس يا اسلام بص يا كركر .. أنا عارف إن الريس أهلاوي .. فلو جه ولقى عندنا في منتدى الرياضة مواضيع عن الزمالك وأعضاء زملكاوية عمالين بيبعبعوا في الكلام .. ممكن الراجل يأذينا .. لذا بأقترح إننا نقوم بعملية سحل مؤقت للزملكاوية وعلى رأسهم امجد ومورا ..... ونجيب الاهلاويه اللى فى المنتدى وعلى رأسهم نهال ونمسكهم أعلام حمرا ونلبسهم فانلات حمرا وندهن وشهم احمر ونحفظهم كام شعار من بتوع بص شوف الأهلي بيعمل إيه .. وصالح سليم يا مدرسة .. والحاجات دي ويقفوا على منتدى الرياضة وأول ما يلمحوا الريس جاي من بعيد يدوها علطول

امجد : قشطة يا نوووودا ...... ده الريس كده عمره ما هاينسى الزيارة دي بس انت عايز تسحلنى يا نودا مكنتش عشرة ايام و شهور و سنين

ساندى : استنى بس يا امجد بس أنا عرفت إن جمال بيه له ميول زملكاوية وممكن يزعل

كركر : يا ساندى ...... طالما الريس موجود يبقى عاش الملك ... لما جمال يبقى يترستأ على الكرسي يبقى يحلها ربنا بقى وعلطول نقوم عاكسين الأية ... فنسحل الأهلاوية .. ونلمع الزملكاوية ... ده شغل كبير اوى عليكى

و الى اللقاء فى الحلقه القادمه

motshkreen ya basha

ana elly elmafrood ba2ol elklam dah

hehehhe

hatwdeny fe dahya ya amgd

يا سلام
القصة ولعت يا مان
كمل كمل
ولسة

امال انتى شاطره تردى عليا انا بس يعنى و تقعدى تغلطينى فى الكلام دايما هى دى يا بنتى الدور المناسب ليكى

و الجاى هيولع اكتر يا اسلام و اكتر و انتظرونى فى الحلقه المقبله

ههههههههههههههههههههههه
انا باقترح اننا نعمل مكتبه
ده ايه العقلانيه اللى انا فيها دى
تسلـــــــــــــــــــــم
وفي انتظار الجديييييييييد

جميلة الحلقة دى جميلة اوى ومميزة عن اى حلقه جامده بس قولى حلقتها عند مين هههههههه والله بجد بهنيك موضوع حلو

جميل جدااااااااااااااااا
في انتظار جديدك

جميله اوى الحلقه دى بس حرام تسحلنى يا مهند عشان زملكاويه بس فى اقتراح ممكن وقتها ابقى اهلاويه مؤقتا وبعد كده ارجع صح؟؟؟هههههههههههههههه شكرا بجد على الموضوع الرائع ده

حلقه جميله ااااوىىىىىىىىىىى فى انتظار الجديد من الابداعات ميرسى لك

ههههههههه شكرا على مروركم كلكم

اولا يا ساندرا انتى ساعات بيجيلك وقت كدا (ساعات بس) بتبقى عاقله يعنى

ثانيا يا مصرى الحلقه دى حلقتها فى البيت احسن من اللى تحت المزلقان اللى بتحلق عنده يوم الخميس ( اكيد فاهمنى )

ثالثا يا ساسو الجديد النهرده

رابعا يا مورا على فكره انا هتسحل معاكى لانى فى سر مخبيه على الكل انى زملكاوى اوى

خامسا يا شيماء الجديده النهرده يا شيماء

هههههههههههههههههههههه
ماشي يا امجد
انا يعنى في الغالب مجنونه
ماااااااشي
في انتظار الحلقه السابعه النهارده

الحلقه السابعه

كركر : بالنسبة لدور الأخ سامح بتاع الإعلام .. إنت هاتبقى مهمتك في غاية الخطورة والحساسية ، إشرحله يا امجد

امجد : بص يا سامح .. إنت هاتكون مرافق للبعثة الإعلامية المرافقة للسيد الرئيس وركز قوي على سمير رجب وراضيه على قد ما تقدر .. وكل دورك هايبقى منحصر في إنك تمسك كشاف وتقعد كل واحد في مكانه اللي هانتفق عليه

سامح : يعني هاشتغل Placer يعني ؟

كركر : شاطر أديك فهمت اهو

سامح : حاضر ... خلص الكلام

كركر : ساندرا

ساندرا : أفندم

كركر : إيه يا سندرا هو احنا في كانتين الجيش .. أقعدى يا حبيبتي ... بصى يا سندرا إنتى دورك هايكون مهم وحساس للغاية أيضاً ، إنتى عارفه إننا هانحبس بقيت الأعضاء الأفاضل في المنتدى وراء حاجز زجاجي مضاد للرصاص وكل دورهم هايكون إنهم يتفرجوا علينا سواء وإحنا بنلف على الأبواب أو وإحنا بناكل الاكل بتاع ولعتين يعني " متفرجون لا مواطنون " .. لذلك إنتى هاتقفى معاهم ورا الساتر وهاتاخديلك ساتر على جنب وكل دورك إنك هايبقى معاكى يافطتين ...

ساندرا : أيوه عارفه .. يافطة مكتوب عليها للإيجار والتانية تمليك

امجد : إيجار إيه يا حاجه سندرا ؟ .. إيه شغل السماسرة ده ؟ يا ستي يافطة هايبقى مكتوب عليها تصفيق .. ترفعيها لما أشاور لك بإيدي اليمين ... ويافطة مكتوب عليها هتاف ودي ترفعيها لما أشاور بإيدي الشمال

مهند : اما المصرى و المحلاوى فهايمسكوا شوم ويقفوا جنب سندرا والعضو اللي مش هايتسجيب أو يسقف زي ماحنا عايزين .. يدولوه علطول

المحلاوى : نعم يا خويا ؟؟؟؟ بقى أنا مقطع نفسي عشانكوا.. وفي الاخر أقعد مع عامة الشعب .... طب والأكل ؟

امجد : يا بني هاتكل ما تخافش .. هاعينلك علبتين من بتوع ولعتين تاخدهم معاك وإنت مروح جتك نيله عليك و على فجعتك

المحلاوى : امجد لو حصلت أي حركات كده ولا كده .. انا ممكن اخسرك .. إلا الاكل .. انا هاموت وأشوف الأكل بتاع ولعتين ده عامل إزاي .. ده مستقبلي ومستقبل عيالي

كركر : بالنسبة للأخت ساسو دورها هاينحصر في إنها تاخد الشباب الصغير اللي هما جيل الطلائع ويقفوا بره خالص وأول ما الريس ينزل من عربيته يرفعوا أعلام مصر الصغيرة ويروح قايلين النشيد الوطني لجمهورية مصر العربية

امجد : انا بأقترح يا بوس نحفظهم برضوا كام طقطوقة من الحاجات الوطنية اللي عندنا .. زي كل بلاد الدنيا جميلة لكن أجمل من وطني لا ..... ومصر يا أول نور في الدنيا شق الظلام بالليل ... بس لو هايعكوا يبقى نتعاقد مع محمد زروت احسن

كركر : اركن دلوقتى يا امجد

نهال : إنتوا نسيتوا نقطة مهمة يا جماعة ..... السيدة الفاضلة سوزان مبارك .. مين اللي هايستقبلها مننا ؟

كركر : انتى طبعا ومعاكي لفيف من بنات ومشرفات المنتدى كممثلين عن الجنس اللطيف هنا

مهند : انا بأقترح يبقى معاكي .. شيماء وساندى وبنوته زى العسل ومورا

امجد : إعتراض ... أولاً شيماء هاتصدع دماغ الست سوزان وتكلمها عن حروق المرأة والظلم والاضطهاد التي تتعرض له النساء في عصر مبارك والست سوزان ما بتحبش كده هي بتاعت مكتبات والتطعيم ضد شلل الاطفال والثلاثي ...
وبنوته زى العسل غاوية خناقات و دم و دى بالذات مش بتطيق و لا الريس و لا الوزراء و لو شافتهم مش هيهمها و هتبطحهم باى حاجه و هتتسبب فى اغلاق المنتدى

كركر : يبقى ما فاضلناش غيرنهال وساندى و مورا

امجد : أنا بأقترح أخدهم وانزل بيهم الموسكي أشتريلهم كام فستان على كام شراب فيليه وشنطة وجزمة شكل بعض عشان يبقى منظرهم حلو ... إيدك بقى يا ريس

كركر : إيدي إيه ؟

امجد : إيدك على 120 جنية عشان الحاجات دي .. أحنا داخلين على عيد والكحك بقى والكلام ده وبستلف ثمن أكلي

كركر : طب خلي نهال و ساندى و مورا يدفعوا وهابقى احاسبهم .. أو ياخدوا ببقية حسابهم إنذارات

مهند : عايزينك بقى يا نهال إنتي والبنات تسلوا الست سوزان وتبعدوا عن أي حاجة تزعلها .. وخلي ساندى تقعد تحكيلها شوية من مغامرتها في بلاد فارس وما وراء النهرين و الهجص بتاع ساندى دا اللى بتقعد توسع علينا بيه .. انا عارف الحريم بيحبوا الحكاوي و الفشر دا اوي ، الرغى بقى ، وانا بأحذر مورا إنها تتلامض او تتفلسف قدام الست .. عايز الليلة تعدي على خير وعايز روحكوا تبقى خفيفة

اسلام : إيه يا جدعان وانا وقعت من قعر القفة .. دوري فين مانا مشرف برضوا ...ولا أنا كمالة عدد وجايبيني عشان بتتفألوا بي ؟

كركر : يا أخ اسلام ( No Love ) ، ( مازلت أرجو ان تغير إسمك اللي بيسببلي احساس فظيع بالكآبه ) إنت حولك علامات إستفهام سوف يتم مناقشتها لاحقاً بعد ان نخلص من هذا الكابوس

امجد : يبقى خلاص كده موافقة ... ربنا معاكوا يا ولاد وما تنسوش تستحموا كلكوا يوم الزيارة وكل واحد يروح على موضوع " ما هي كولونيتك المفضلة " ويختار له نوع من الحاجات اللي أفتر شيف على حسابي

اليــوم المـوعــــــود

هدير الموتوسيكلات الذى يسبق موكب الرئيس يدوى فى المنتدى.....تتبع الموتوسيكلات سيارات جيب محملة بجنود من الحرس الجمهورى وقوات الكوماندوز.....صوت سارينات سيارات الشرطة والأمن المركزى والحراسة يصم الأذان.....سيارات مرسيدس سوداء تتبع الواحدة الأخرى....سيارة السيد الرئيس وقرينته لا تزال غير معروفة لأن جميع السيارات المرسيدس يشبه بعضها البعض لدواعى أمنية.....يقف كل مشرف من المشرفين على باب من أبواب المنتدى وقد إرتدوا تى شيرتات موحدة عليها صورة كركر كرمز لاحلامنا الحلوة وشورتات زرقاء وبيد كل واحد منهم بالونة ومقص

كركر وامجد و مهند يقفون فى المقدمة فى إنتظار سيارة السيد الرئيس والتى لم يعرف بعد على أى المنتديات سوف تقف ...... تجرى الرياح بما لا تشتهى السفن....فقد وصل للمخابرات الحربية معلومات مفادها أنا المنتدى مليئة بالأعضاء المشاغبين وأعداء النظام الرئاسى فى الدولة....

ينتشر جنود الأمن المركزى بهراوتهم الغليظة ويضربون بعنف فى المشرفين ظانين أنهم أعضاء المنتدى وأنهم يضمرون السوء للرئيس ومرافقيه

امجد : الله الله الله ..... إيه اللى بيحصل ده يابوص

كركر : بوص إيه وسخام إيه دلوقتى ... أى ياعينى

يقع امجد على الأرض والدماء تسيل من فمه على إثر شلوت من جندى هلف من جنود الأمن المركزى أصاب موقع حساس فى جسده .... يردد امجد أغنية عبد الحليم حافظ ( إن مت ياأمى ماتبكيش...راح أموت علشان بلدى تعيش...إفرحى يا امه وزفينى...وفى يوم النصر افتكرينى )

مهند وقد أصابته ضربة شومة والدماء تغطى وجهه : بلادى بلادى بلادى لكى حبى وفؤادى... ...ياخوانا دى احلامنا الحلوة مش الاخوان ولا حاجه ... إنتم أكيد غلطانين فى العنوان ... إحنا بنام ونصحى فى حب الأسرة المالكة ... وحياة توشكى ياريس لتخليهم يبطلوا ضرب ... خصيمك مترو الأنفاق ياشيخ خليهم يسيبونا....حلفتك بسيوة والفرافرة .... طب ب 6 اكتوبر...ثم يسقط على الأرض مغشياً عليه

تحتمى نهال خلف ساسو وبتقول : وحياة أبوكى يامدام سوزان تخليهم يوقفوا الضرب... مش علشان خاطرى...علشان خاطر الطفله دى

تقوم قوات الحرس الجمهورى باعتقال نهال وساندى ومورا وتمشط المكان بحثاً عن شيماء إلى أن تجدها مختبأه فى منتدى المطبخ فتقوم باعتقالها

يذهب قائد الحرس الجمهورى إلى سيارة السيد الرئيس مؤدياً التحية العسكرية ومعطياً إياه التمام بأن المنتدى قد أصبحت تحت سيطرة قواته وأن المكان قد أصبح أمناً

ينزل الرئيس وسوزان وجمال وسفوت ونظيف والمشير والشيخ طنطاوى ومرافقيهم إلى المنتدى وهى خالية من المشرفين

مبارك مخاطباً نظيف : أدى أخرة الحرية يا نظ نظ....العيال إفتكروا إن لحمنا مش مر وهاتك ياكتابة...العيال مخلوش حاجة ما كتبوش فيها...فساد...إحتكار سلطة...توريث...جراد...علاء والتوكيلات...حتى دينا الرقاصة الطاهرة ما سلمتش من لسانهم ... خلينا ندخل نشوف إيه اللى مكتوب هنا...يشير معاونوا الرئيس عليه بأن يبدأ بالمنتدى الاسلامى حتى تنقل الصحف ووكالات الأنباء نزعته الدينية التى تتسم بالإعتدال والفهم الصحيح للدين الإسلامى الحنيف بعيداً عن التطرف والإرهاب

يدخل مبارك إلى المنتدى الاسلامى ويقوم بأداء ركعتين شكراً لله ظناً منه أنه قد تخلص من الأعضاء المشاغبين ولا يدرى أن جميع الأعضاء محبوسين داخل منتدى السياسه وأن من تم إعتقالهم هم المشرفين....يؤم الصلاة الشيخ طنطاوى داعياً الله عز وجل أن ينصر صاحب الضربة الجوية التى فتحت باب الحرية وأن يخزى الأعضاء الفاسقين على إختلاف مذاهبهم ومشاربهم وأن ينصره عليهم

الى اللقاء فى الحلقه القادمه

يالهوى
دا كله هيحصل

الحمد لله ياشباب
انتم محضرين النهايه بتعتنا يا حلاوه

اكيد نهايه مئاساويه
الا قولى يا امجد مفيش متوفين ولا كله اصابات

وانا زعلان من نهال كمان
يكون عندها وز وبط على السطح وتجبلناش بططين لما اتقبلنا
صحيح ملكيش حق خالص يا نهال

كركر

و الله ما اعرف يا محمد بس اعتقد كله اصابات متخافش

و انتى يا نهال صحيح ملكيش اى حق فعلا مفيش كدا كام بطه لينا

هههههههههههههههههههههههههههه
سلاااااااااااامتكم من الضرب

ههههههههههههههههههههههههههه
لا جامده يا واد يا امجد
بجد لذيذه مووووت

في انتظار الجديد

» اللحظات الاخيرة .. ستبكيك
» لعبة شمس المنتدى وقمر المنتدى!!
» ياسااااااتر على دول مشرفين وعلى دول اعضااااء
» مدرسه ام ترتر (جامده مووووووت) الحلقه السااااااااااااابعه
» يوميات صرصور